 |
Undanfarin ár hefur verið unnið að heildarskipulagi útivistarsvæða fyrir Reykjavík. Þessi vinna byggir á fagurfræðilegum, skipulagslegum og vistfræðilegum þáttum og er unnið í kjölfar ítarlegra úttekta á opnum svæðum í borginni.
Úttektirnar ná til gróðurs, dýralífs, mannvistarminja, landslags og gildis opinna svæða til fræðslu og útivistar. Niðurstöður þessara athugana hafa verið notaðar við skipulag opinna svæða eins og fram kemur í Aðalskipulagi 1996 – 2016. Aðalskipulagið hefur nú verið endurskoðað og er hægt að nálgast nýja Aðalskipulagstillögu 2001 - 2024 og fylgiskjöl þess hér.
Hægt er að skipta borgarlandinu í 24 landslagsheildir eða skipulagseiningar. Þessi skipting auðveldar greiningu á svæðunum og almenna stefnumótun fyrir deiliskipulag þeirra. Þessa skiptingu má sjá í þemahefti borgarskipulags um umhverfi og útivist sem hægt er að nálgast á borgarskipulagi Reykjavíkur. Til samanburðar má finna Þróunaráætlun miðborgar hér og Svæðisskipulag höfuðborgarsvæðisins hér .
Græni vefurinn
Samkvæmt skilgreiningu samanstendur Græni vefurinn af fjölbreyttum útivistarsvæðum og stígum borgarinnar. Með heildarskipulagi græna vefsins er hugsunin sú að mæta þörfum sjálfbærrar þróunar og er skipulagið jafnframt stjórntæki fyrir framkvæmdaaðila borgarinnar. Grundvallaratriði skipulagsins eru stofn- og tengistígar borgarinnar sem liggja milli allra útivistarsvæða. Hér mætti nefna tengingu milli Heiðmerkur, Elliðaárdals, Öskjuhlíðar og Miðbæjar án þess að vegfarendur þurfi að fara yfir meirháttar umferðaræð. Þannig tengja stígarnir útivistarsvæðin og bjóða þar af leiðandi upp á marga möguleika á útivist. Stígarnir liggja á landi sem er auðvelt yfirferðar venjulegast á grænu belti sem er milli 30 – 50 m breitt. Mikil áhersla hefur verið lögð á gerð stofnstíga undanfarin ár og hafa þeir lengst að meðaltali um 6 – 7 km hvert ár. Í heild hafa stígar lengst að meðaltali um 10 – 15 km undanfarin 5 ár. Hér fyrir neðan má sjá þróun á lengd gönguleiða (km) í Reykjavík undanfarin ár.
| 1994 |
1995 |
1996 |
1997 |
1998 |
1999 |
2000 |
2001 |
2002 |
| 486,1 |
498,5 |
515,2 |
531,1 |
541,0 |
556,3 |
576,8 |
591,0 |
602,0 |
Útmörkin og Græni trefillinn
Útmörk Reykjavíkur er landsvæði sem nær yfir Hólmsheiði, Reynisvatnsheiði, Grafarheiði og umhverfi Rauðavatns, Rauðhóla og Heiðmörk. Þetta svæði er hluti af samfelldu skógarsvæði sem nær frá Esjurótum suður í Undirhlíðar við Hafnarfjörð. Hér eru einstök votlendi og gróðurlendi undanskilin skógræktarsvæðum. Heildarskipulag af þessu svæði liggur fyrir og er kallað Græni trefillinn og var unnið að frumkvæði Samtaka sveitarfélaga á höfuðborgarsvæðinu (SSH).
Eitt af markmiðum skógræktar í útmörk er að veita byggðinni skjól, bæta loftgæði og auka útivistarmöguleika íbúa Reykjavíkur. Því þarf að koma á ákveðnu jafnvægi á milli framtíðarbyggðar og útivistarsvæða útmerkurinnar. Í því tilliti hafa vaxtarmörk nýrrar byggðar verið skilgreind en þau liggja um sunna við Úlfarsá og Hamrahlíðarlönd, Reynisvatnsheiði og Hólmsheiði, svæði umhverfis Rauðavatn, Rauðhóla, Elliðavatn og Heiðmörk. Þessa línu má sjá á nýju Aðalskipulagskorti hér.
Um þessar mundir er verið að leggja lokahönd á framtíðarstefnumótun á notkun Viðeyjar og annarra eyja á Sundum. Þessi stefna mun birtast hér þegar hún liggur fyrir.
Frekari upplýsingar um náttúrufar og útivist
Heimasíður um Elliðaárdalinn má finna hér, Grasagarðinn og Fjölskyldu - og húsdýrarðinn hér og garðyrkjudeild Umhverfis- og heilbrigðisstofu hér. Orkuveita Reykjavíkur hefur farið með skógrækt í Elliðaárdalnum. Hér má finna upplýsingar frá Orkuveitunni um umhverfismál, m.a. um vatnsvernd og Hengilssvæðið, Úlfljóstsvatn og umsjónarsvæði þeirra á höfuðborgarsvæðinu. Á vef Íþrótta- og tómstundaráðs má finna upplýsingar um sundlaugar og ylströndina í Nauthólsvík. Að lokum má finna upplýsingar um Heiðmerkursvæðið hér.
|
